امبارح احمد مكى وعد الجمهور بمفاجأة هيعلن عنها النهاردة وفعلاً وفى بوعده ونزل تيزر فيلمه الجديد اللى مكسر الدنيا من قبل ما ينزل "سيما على بابا" اللى عمل فيه مكى افتكاسة جديدة وغريبة واول مرة تتعمل في تاريخ السينما المصرية وهو إن الفيلم عبارة عن فيلمين جوه بعض حتي كان مكتوب علي بوستر الفيلم " فيلمين في بروجرام واحد " زي ما بتعمل سينمات الدرجة التالتة واشهرهم سينما علي بابا في بولاق.
والفيلم الاول هو حزلئوم في الفضاء وبتدرو احداثه عن كوكب "ريفو" في الفضاء اللي بيخطف حزلقوم ويعمل عليه تجارب خيالية وبيشارك في الفيلم ده هشام اسماعيل ولطفي لبيب في دور الفضائيين.


والفيلم التاني اسمه "الديك في العشة " وبتدور احداثه في مزرعة وبيجسد مكي شخصية ديك بيعيش وسط حيوانات المزرعة اللي هما فيها وبيحاول مكي إنه يدافع عن المزرعة ضد الذئاب والضباع اللي بتحاصر المزرعة وبتفرض اتاوات عليهم وبتظهر في الفيلم ده ايمي سمير غانم في دور فرخة.
فيلم سيما علي بابا عمل فيه مكي مكياج شكله جديد جداً خلي كل الفنانين المشاركين معاه في الفيلم يظهروا في شكل مختلف سواء في ادوار الفضائيين او في ادوار حيوانات المزرعة والفيلم من تأليف شريف نجيب واخراج احمد الجندي.