كتب smile
بلح الشام ولا عنب اليمن طيب نعمله ازاي وايه طريقته
ويكون خفيف وسهل عالمعده وحلو كده
نجلاء الشرشابي عملته بطريقه فوق الخيال وكانت بتقطعه بالمبشره عشان تعمله شكل شيك زي بتاع المحلات
روعه تعالوا نشوف




نبدا بسم الله



اول حاجه هانجهز الشربات
ولازم يكون تقيل مش خفيف
هانحط كوبيتين سكر مع كوبايه و نص ميه و نسيبهم علي النار لحد ما نوصل للقوام اللي عاوزينه حوالي 10 دقايق و نضيف عليهم كيس فانيليا و نص لمونه معصوره و نسيبه يبرد خالص و نحطه في التلاجه

بعد كده هانبدا في بلح الشام



كوب و ربع ميه
تلت كوب زيت
2 كوب دقيق
ذره ملح
3 بيضات

هانحط الزيت و الميه و الملح مع بعض و هانحطهم علي النار لحد مايغلو



بعد كده هانضيف الدقيق و نقلبه
هايبقي شكله كده في الاول



هانفضل نقلبه كويس اوي لحد مايبقي شكله كده



هانسيبه يبرد شويه
ونبتدي نضيف البيض واحده واحده و نعجنها لحد ما العجينه تشربها نروح ضايفين اللي بعدها



و هكذا لحد ما يبقي شكله كده



هانجيب القمع و كيس و نخرم الكيس مكان فتحه القمع و نحط العجينه فيه و نبتدي نقطع بلح الشام

بس قبلها هانكون مجهزين طاسه فيها زيت عزير و النار واطيه خاااااااااالص و ننزل بقي بلح الشام علي الزيت لحد ما نملي الطاسه




هانلاقيه نزل في القاع الاول و بعد كده هايطفو لفوق ومانحركهوش خالص لحد ما يحمر الوش اللي تحت و نقلبه بعد كده
ونطلعه علي مناديل مطبخ تشرب الزيت



و نحطه في الشربات و نسيبه دقيقتين تلاته و نطلعه




و نرش عليه جوز هند و بالف هنا و شفا






انا ,smile
اذا كان لديك استفسار اضغط هنا، وسأقوم بالرد عليك